Портпаролката на Европската комисија, Паула Пињо, денес јавно одговори на критиките на американскиот претседател Доналд Трамп, кој во интервју за „Политико“ ги оцени европските лидери како „слаби“.
„Многу сме задоволни и благодарни што имаме одлични лидери, почнувајќи од претседателката на Европската комисија, Урсула фон дер Лајен, на која сме навистина горди“, изјави Пињо. Таа нагласи дека Европа има силни и искусни лидери кои успешно се справуваат со бројните предизвици, од трговски прашања до безбедносни ризици во соседството.
Портпаролката посочи дека лидерите на 27-те земји-членки ја водат ЕУ како мирољубив и стабилен проект, и дека милиони граѓани се горди на нивната работа.
Трамп, пак, во интервјуто оцени дека Европејците се слаби и дека Русија е во позиција на сила во војната во Украина. Тој ги критикуваше европските влади за „неактивност“ и за имиграциските политики, тврдејќи дека тие довеле до проблеми во големите градови како Париз, Лондон и Стокхолм.
„Ние сме горди на нашите лидери и на начинот на кој ја водат Европа“, додаде Пињо, јасно ставјќи до знаење дека оценките на Трамп не ја одразуваат позицијата на Европската комисија.
