Европската унија долго време работеше на забрана за продажба на нови автомобили со мотори со внатрешно согорување, но по низа предупредувања од индустријата, пониска побарувачка на електрични модели и растечка загриженост за работните места, планот почнува да се менува.
Комесарот за одржлив транспорт и туризам, Апостолос Цицикостас, потврди дека моторите со внатрешно согорување ќе имаат иднина, но само ако користат горива со ниски емисии. Тоа вклучува синтетички горива и биогорива како HVO100, кои ги намалуваат емисиите до 90% и веќе се користат во некои модели на BMW и Audi. Porsche, пак, произведува е-горива со речиси безјаглероден отпечаток во Чиле, што им овозможува на моторите да преживеат и во технолошки адаптирана форма.
Во меѓувреме, пазарот се менува со своето темпо: електричните автомобили сочинуваат 18,3% од продажбата во Европа, хибридите се најпопуларни со 34,7%, а хибридите со приклучок со 9,4% првпат ја надминаа продажбата на дизел автомобили.
Мнозинството европски и американски производители го поздравуваат овој пофлексибилен пристап, иако некои компании, како „Волво“ и „Полестар“, инсистираат на задржување на првичниот рок. Новиот пакет мерки од ЕУ ќе биде презентиран до крајот на месецот.
