Европската унија денеска ги повика сите страни во конфликтот во Појасот Газа да го почитуваат веќе договореното примирје, откако израелската армија соопшти дека повторно го воспоставила прекинот на огнот по серија воздушни напади во кои загинаа над 100 луѓе.
Портпаролот на Европската служба за надворешни работи, Ануар ел Ануни, истакна дека „не постои воено решение за овој конфликт“ и дека е време да се стави крај на „циклусот на насилство, смрт и разурнување“.
Европската комисија јасно побара воздржаност од сите страни и предупреди дека почитувањето на примирјето, постигнато претходно овој месец, мора да продолжи.
Потпретседателката на Комисијата и шпанска комесарка за конкурентност, Тереса Рибера, уште поостро ги осуди новите израелски напади. На платформата „X“ таа порача:
„Ни треба шанса за мир, а не нови изговори за напади.“
Израелската армија претходно изврши воздушни напади врз десетици цели во Газа како одговор на гранатирањето во кое загина еден израелски војник, но од денеска повторно го почитува примирјето.
Според Цивилната одбрана во Газа, во овие напади загинаа над 100 лица, што дополнително ја влошува веќе тешката хуманитарна состојба во регионот.
Европската унија повторно нагласи дека ќе продолжи да ги поддржува дипломатските напори за постигнување траен мир меѓу Израел и Палестина, заснован на преговори и меѓународно право.
Не дознавај последен- читај ПРВ.мк
