Турскиот претседател Реџеп Таип Ердоган испрати силна политичка порака до Европа, нагласувајќи дека односите меѓу двете страни се менуваат во новиот светски поредок.
Тој изјави дека Турција продолжува стабилно да се движи кон своите цели, и покрај глобалните кризи, конфликти и економски превирања.
„Денес, потребата на Европа за Турција е поголема од потребата на Турција за Европа, а во иднина оваа разлика ќе биде уште поголема“, порача Ердоган.
Според него, светот влегува во нова ера на мултиполарност, во која Турција има сè поголема улога и станува еден од клучните актери во меѓународните односи.
Ердоган додаде дека Европа се наоѓа на историска раскрсница и треба да одлучи дали ќе ја гледа Турција како партнер и можност или ќе продолжи со, како што рече, застарени политички предрасуди.
Тој повика на „чесни, искрени и праведни односи“ меѓу Анкара и Брисел, истакнувајќи дека Турција во последните години значително ја зајакнала својата позиција и стабилност во регионот.
