ЕКСТРЕМНА ЖЕШТИНА ЈА ПАЛИ ЕВРОПА: Топлинска купола се спушта и носи пеколни 45 степени!

Додека летото календарски сè уште не е започнато, Европа ја очекува првиот сериозен топлински бран оваа сезона. Метеоролозите предупредуваат дека силна „топлинска купола“ во текот на наредните денови ќе зафати поголем дел од континентот, носејќи температури и до 45 степени Целзиусови во одредени делови на Португалија, Шпанија и Франција.

Според прогнозата на метеоролошкиот портал „Severe Weather Europe“, над западна и централна Европа се формира масивна област на висок воздушен притисок, позната како „топлинска купола“, која ќе го зароби исклучително топлиот воздух пристигнат од Сахара и ќе спречи негово мешање со постудените воздушни маси.

Дури до 18 степени потопло од јунскиот просек!

Експертите предупредуваат дека овој временски шаблон ќе доведе до долготраен период на екстремни жештини, а дополнителен проблем претставува фактот што земјиштето широм Европа е веќе изразено суво по рекордно топлиот крај на мај. Поради тоа, природниот процес на ладење преку испарување ќе биде значително ослабен, што дополнително ќе придонесе за раст на температурите.

Се очекува температурите на крајот на јуни да бидат од 14 до 18°C над просекот за овој месец, а локално и повеќе.

Топлинскиот бран од викендот ќе се шири од северозападна Африка кон југозападна и западна Европа, а потоа постепено ќе продолжи кон север и исток, доминирајќи со поголемиот дел од Европа во остатокот од јуни. Областа на висок притисок дополнително ќе се шири и ќе биде над просекот речиси насекаде, освен на крајниот југоисток, крајниот север на Европа и над Северниот Атлантик.

Шпанија, Португалија и Франција најмногу на удар

Највисоките температури се очекуваат на Пиринејскиот Полуостров. Во Португалија и Шпанија на почетокот на наредната недела можни се вредности и до 45 степени Целзиусови.

Франција исто така ја очекува исклучително тежок период. Одредени метеоролошки модели предвидуваат дека во централните, северните и западните делови на земјата температурите во понеделник би можеле да достигнат меѓу 41 и 44 степени. Во Париз и другите поголеми градови се очекува повеќедневен период со температури меѓу 35 и 40 степени, што е и до 15 степени над просекот.

Топлинскиот бран се шири кон север и исток

Жештината во текот на викендот ќе ги зафати и Германија, земјите од Бенелукс и Велика Британија, каде што температурите главно ќе надминуваат 30 степени.

Метеоролозите наведуваат дека и Балканот ќе го почувствува влијанието на овој бран, но засега не се очекуваат екстреми како оние во Франција или Шпанија. Температурите во поголемиот дел од регионот би требало да се движат меѓу 30 и 35 степени, иако според мапите – бранот сосем солидно ќе нè „закачи“ и нас.

Што е „топлинска купола“?

Топлинската купола настанува кога над големо подрачје ќе се задржи силен систем на висок воздушен притисок.

Тој делува како капак на тенџере – го спречува подигнувањето на топлиот воздух и неговото мешање со постудените слоеви на атмосферата. Поради тоа, воздухот при тлото дополнително се загрева, носејќи екстремно високи и рекордни температури.

Доколку оваа појава е изразено стабилна, обично трае неколку дена или дури недели. Токму ваквите метеоролошки услови беа клучната причина за некои од најинтензивните топлински бранови кои во изминатите години ги погодија Европа, САД и Канада.

Ризик од суша и пожари

Метеоролозите предупредуваат дека долготрајниот период на високи температури би можел дополнително да ја влоши сушата во многу делови од Европа и сериозно да го зголеми ризикот од шумски пожари. Бидејќи се очекува силниот систем на висок притисок да се задржи до крајот на месецот, постои можност топлинскиот бран да се продолжи и во текот на последните денови од јуни.