Американскиот претседател Доналд Трамп потврди дека САД ќе ѝ испратат на Украина нови пакети оружје, вклучувајќи ги и моќните ракети „Патриот“, и тоа преку НАТО, која ќе ги покрие трошоците и ќе ја врши дистрибуцијата. „Ќе ги испратиме Патриотите во НАТО, а потоа НАТО ќе ги прераспредели“, рече Трамп, додавајќи дека целата сума ќе ја надомести алијансата.
Оваа изјава е драстичен пресврт во ставот на неговата администрација, која досега се залагаше за ограничена воена поддршка. Одлуката доаѓа по „позитивниот дијалог“ со украинскиот претседател Зеленски, кој побара 10 системи за да се справи со жестоките руски напади. Германија и Норвешка веќе се пријавија да финансираат неколку од системите.
Трамп призна дека Украина е под сериозен притисок: „Мораме да им испратиме оружје… Сега се силно нападнати“. Минатата недела беа прекинати американските испораки, а нападите со дронови достигнаа рекордни бројки. Во јуни, Украина имаше најмногу цивилни жртви во последните три години.
Трамп, кој сè до неодамна беше воздржан кон помошта, сега бара од Европа да преземе поголем товар. До крајот на 2024 година, САД веќе имаат испратено 69 милијарди долари помош. Иако европските земји се обврзаа на 2% од БДП за одбрана, Трамп смета дека тоа не е доволно.
Во меѓувреме, Трамп најави „големо соопштение“ за Русија во понеделник, а според американскиот државен секретар Марко Рубио, САД работат на нови идеи за можно мировно решение, кои наскоро ќе му бидат претставени на претседателот.
Очигледно е дека Трамп е сè поразочаран од Владимир Путин и го менува курсот – и во односите со Русија и кон поддршката за Украина.
