Пет лица, меѓу кои и едно дете, загинаа во инцидент поврзан со украински дрон во руското црноморско летувалиште Архипо-Осиповка, во близина на Геленџик, соопштија руските власти.
Според официјалните информации од Москва, дронот бил пресретнат од противвоздушната одбрана, но неговите остатоци паднале врз плажа каде што во тој момент престојувале капачи. Во инцидентот се повредени и повеќе лица, а на местото веднаш интервенирале екипи на итната медицинска помош и спасувачките служби.
На социјалните мрежи беа објавени снимки на кои се гледа како луѓе во паника ја напуштаат плажата по експлозијата.
Инцидентот се случил во близина на резиденција кај Геленџик која дел од медиумите ја поврзуваат со рускиот претседател Владимир Путин. Засега нема официјална потврда дека таа локација била цел на нападот, ниту дека дронот бил насочен кон неа.
Нападот доаѓа во период на засилени удари со беспилотни летала меѓу Русија и Украина. Руските власти соопштуваат дека во последните денови пресретнале голем број украински дронови, додека од украинска страна редовно се изведуваат напади врз воени и логистички цели на руска територија.
Војната меѓу двете земји сè почесто се прелева далеку од линијата на фронтот, а нападите со беспилотни летала продолжуваат да предизвикуваат човечки жртви и материјална штета.
