Руски извидувачки авион без транспондер и без најавен лет влета во меѓународниот воздушен простор над Балтикот, предизвикувајќи веднаш реакција од германските воздухопловни сили. Инцидентот, кој го објави весникот „Билд“, се случил во петокот кога авионот Ил-20М полетал од руската енклава Калининград и се приближил до границите на Германија и Полска.
Без вклучен сигнал и план за лет, авионот бил пресретнат од два „Еурофајтер“ авиони кои полетале од базата Лаге кај Росток. Контактот бил воспоставен на околу 100 километри од германскиот брег, по што рускиот авион се повлекол кон север, останувајќи во меѓународниот простор.
Овој случај доаѓа во време кога тензиите во Балтичкиот регион се зголемени, особено по приклучувањето на Финска и Шведска во НАТО. Западните земји сè почесто предупредуваат на слични руски воздушни провокации во близина на нивните граници.
