Центарот на Белград вечерва беше сцена на тензични случувања откако студентите го завршија протестот „Студентите во блокада“ во 21 часот. Набргу потоа, дел од демонстрантите започнаа да фрлаат камења, петарди и шишиња кон полицијата, која одговори со силно присуство и распоредување на жандармерија.
До 22 часот беа приведени неколку лица, а булеварите околу парламентот се блокирани со три полициски кордони. Претходно, илјадници студенти и граѓани се собраа на протестот „Се гледаме на Видовден“, со барања за вонредни избори и оставка на Владата.
Студентите од говорницата порачаа: „Ја прогласуваме сегашната влада за нелегитимна“ и најавија дека „народот има зелено светло да ја преземе слободата“. Поддршка добија и од ректорот на Универзитетот во Белград, кој рече дека студентите ја обединиле нацијата во борбата за демократија и правда.
Останува неизвесно дали состојбата ќе се смири или ќе ескалира, откако ултиматумот до Владата истече и демонстрантите повикаа на граѓанска непослушност.
