Украинскиот претседател Володимир Зеленски повторно предупреди дека Украина нема доволно средства за одбрана од руските балистички ракети, оценувајќи дека е „апсурдно“ што производството на современо оружје сè уште не ги задоволува реалните потреби за заштита на цивилното население.
Во своето вечерно видеообраќање, Зеленски истакна дека во денешниот свет не би требало да постои недостиг од системи за противвоздушна одбрана.
„Едноставно е апсурдно што во современиот свет производството сè уште не е зголемено на нивото што навистина е потребно за заштита на луѓето од балистички терор“, порача тој.
Според него, Украина располага со знаење, експертиза и капацитет за производство на современо оружје, но нагласи дека се потребни американски дозволи за производство на системите „Патриот“.
Зеленски оцени дека доколку таквите дозволи бидат одобрени, Украина би можела да произведува доволно системи не само за сопствената одбрана, туку и за поддршка на своите сојузници.
Тој предупреди дека недостигот од пресретнувачки ракети останува еден од најголемите предизвици за украинската противвоздушна одбрана и ги повика САД и европските партнери, на претстојниот самит на НАТО во Анкара, да донесат конкретни одлуки за дополнително зајакнување на одбранбените капацитети на Украина.
„САД и Европа имаат сосема доволно сила да го запрат овој терор“, порача Зеленски.
