Тешка трагедија ја потресе Австралија, откако на изолирана плажа во државата Нов Јужен Велс ајкула нападна две млади лица кои пливале во раните утрински часови. Девојка на околу 20 години починала веднаш, додека момче на истата возраст е итно пренесено со хеликоптер во болница во критична состојба.
Инцидентот се случил на плажата Кајлс, во Националниот парк Кроуди Беј, околу 300 километри северно од Сиднеј. Екипите на Итната медицинска помош биле алармирани веднаш, но судбоносните секунди пред нивното пристигнување биле пресудни – случаен минувач со импровизирана подврска успеал да го запре силното крварење на ранетото момче, гест што, според службите, буквално му го спасил животот.
„Храброста на луѓето во вакви моменти е неверојатна. Тоа беше вистински херојски чин кој ни овозможи да стигнеме навреме,“ изјави претставник од Итната помош.
Надлежните служби соопштија дека нападот најверојатно го извршила голема ајкула-бик – еден од најопасните видови во светот, познат по тоа што живее и во слатка и во солена вода. Според австралиските институции, ајкулите-бик се меѓу најсмртоносните видови и можат да достигнат должина до 4 метри.
Плажата веднаш била затворена, а во водата се поставени мамки со куки за да се привлече ајкулата, со цел да биде лоцирана, обележана и безбедно вратена назад. Беспилотни летала патролираат над областа, а соседните плажи ќе останат затворени најмалку 24 часа.
„Ова е ужасна трагедија. Нашите мисли се со семејството на младата жена која го загуби животот,“ изјави директорот на спасувачката служба, Стив Пирс, повикувајќи ги граѓаните да се држат подалеку од водата додека трае истрагата и надзорот.
Овој напад е петтиот фатален во Австралија за годинава. Последниот се случил пред помалку од три месеци, кога маж беше убиен во редок напад на северните плажи во Сиднеј. Статистиките покажуваат загрижувачки тренд – во последните две децении бројот на вакви инциденти е во пораст.
Професорот Чарли Хувенирс од Универзитетот Флиндерс предупредува дека зголеменото присуство на луѓе во крајбрежните подрачја, климатските промени и промените во однесувањето на морските предатори се дел од причините за растот на нападите.
Трагедијата уште еднаш го отвора прашањето: дали океанските зони стануваат сè поопасни, или луѓето се приближуваат премногу кон природниот простор на најопасниот морски предатор?
