Постигнат значителен напредок во трговските разговори меѓу САД и Кина
Американскиот министер за финансии, Скот Бесент, изјави денеска дека е постигнат значителен напредок во разговорите меѓу неговиот тим и тимот на кинескиот вицепремиер Хе Лифенг, кои се одржаа во Женева. Целта на средбата беше да се најдат решенија за намалување на тензиите во трговскиот конфликт меѓу двете најголеми светски економии.
Бесент најави дека повеќе детали од разговорите ќе бидат соопштени утре. Американскиот трговски претставник, Џејмисон Грир, кој исто така учествуваше на состаноците, оцени дека разликите меѓу двете страни не се толку длабоки како што се мислеше претходно, пренесува Reuters.
Разговорите беа насочени кон деескалација на трговската војна која, според економистите, сериозно ја загрозува глобалната економија.
Американскиот претседател Доналд Трамп, пак, изрази оптимизам за текот на преговорите и порача дека се постигнува „голем напредок“ во обидите за решавање на спорните прашања поврзани со царините. Тој дури најави и можност за „целосно ресетирање“ на трговските односи.
„Имавме одлична средба со кинеската делегација денес во Швајцарија. Разгледавме многу прашања и постигнавме значајни договори. Постигнато е целосно ресетирање, во пријателски и конструктивен дух“, напиша Трамп на својата платформа Truth Social.
