Според наводи на странски медиуми, Израел на почетокот од конфликтот со Иран испратил систем за противвоздушна одбрана „Железна купола“ во Обединетите Арапски Емирати, заедно со воен персонал кој ракувал со системот.
Изворите тврдат дека овој потег означил значително продлабочување на безбедносната и разузнавачката соработка меѓу двете држави, која досега не била јавно објавена во ваков обем.
Во истиот период, ОАЕ биле меѓу најчестите цели на ирански напади со ракети и дронови. Според податоци од тамошните власти, биле лансирани стотици балистички и крстосувачки ракети, како и илјадници беспилотни летала, од кои голем дел биле пресретнати од противвоздушната одбрана.
По зголемениот притисок, ОАЕ побарале дополнителна помош од сојузниците, по што Израел наводно испратил единица од системот „Железна купола“ со оператори и пресретнувачки ракети.
Израелски функционери наведуваат дека ова е првпат ваков систем да биде распореден надвор од земјата и дека тој успешно пресретнал дел од проектилите.
Иако потегот се смета за политички чувствителен, двете земји велат дека воената соработка се интензивирала поради заедничките безбедносни закани, особено по мировниот договор потпишан во 2020 година.
