Конфликтот меѓу САД и Иран повторно се интензивираше по новата размена на воени напади, само неколку часа откако американскиот претседател Доналд Трамп изјави дека примирјето со Техеран, според него, е завршено.
Според соопштението на американската Централна команда (CENTCOM), американските сили извеле напади врз повеќе од 90 цели во Иран. Наведено е дека биле погодени системи за воздушна одбрана, ракетни позиции и логистичка инфраструктура, со цел да се намали способноста на Иран да го загрозува бродскиот сообраќај во Ормутскиот Теснец.
Од иранска страна беше соопштено дека како одговор биле нападнати американски објекти во Кувајт, Бахреин и Катар, а подоцна беа пријавени и нови удари кон цели во Кувајт, Јордан и Ирак.
Иранското Министерство за здравство соопшти дека во последните два дена во нападите загинале 14 лица, додека 78 се повредени, од кои околу 50 се хоспитализирани.
Американскиот потпретседател Џеј Ди Венс изјави дека САД ќе продолжат со силен воен одговор доколку Иран повторно напаѓа бродови во Ормутскиот Теснец.
Во меѓувреме, преговорите меѓу Вашингтон и Техеран се одложени, а според достапните информации се очекува разговорите да продолжат по завршувањето на погребните церемонии поврзани со врховниот лидер на Иран.
Напомена: Информациите за конфликтот доаѓаат од официјални соопштенија на вклучените страни, чии тврдења не секогаш можат независно да се потврдат за време на активен вооружен конфликт.
