Пентагон ги предупреди европските партнери – Велика Британија, Полска, Литванија и Естонија – дека испораките на американско оружје ќе доцнат. Причината е јасна: војната со Иран исцрпи огромни резерви и сега нема доволно залихи за сите.
Американската армија е принудена да преместува оружје од други региони, вклучително и Азија, за да ги пополни празнините. Но проблемот е многу поголем од самото одложување – растат стравувањата дали САД имаат капацитет да се соочат со Кина во случај на конфликт околу Тајван.
Одложувањата најмногу ќе влијаат на муницијата за системите HIMARS – мобилни ракетни системи што ги користи и Украина, и NASAMS – противвоздушни системи со среден дострел, заеднички производ на Raytheon и Kongsberg.
Пентагон официјално потврди дека „внимателно ги оценува барањата на партнерите“, но без детали. Доналд Трамп, пак, ги отфрли загриженостите: „Имаме оружје низ целиот свет и можеме да го земеме ако ни треба,“ изјави претседателот.
Експертите не се согласуваат. Том Рајт од Институтот Брукингс предупреди дека САД мора истовремено да водат долга војна на Блискиот Исток и да ја спречат Кина околу Тајван, што значи дека Европа може да остане „на цедило“.
Заклучокот е јасен – Европа мора брзо да ја зајакне сопствената воена индустрија, бидејќи американските залихи веќе се истрошени.
