Малиот сицилијански град Нишеми се соочува со една од најтешките кризи во својата историја, откако силни бури предизвикаа сериозно лизгање на земјиштето и го доведоа во опасност опстанокот на цели населби. Дел од куќите сега буквално висат над стрмни карпи, оставајќи ги жителите во состојба на постојан страв.
Нишеми, кој брои околу 25.000 жители, е изграден на висорамнина што со години покажува знаци на нестабилност. По последните обилни врнежи, теренот почнал забрзано да се урива, поради што над 1.500 луѓе морале итно да ги напуштат своите домови. На некои локации, цели улици се наоѓаат на самиот раб на провалијата, а едно возило останало заглавено опасно блиску до бездната.
Од италијанската цивилна заштита предупредуваат дека дел од објектите повеќе не се безбедни за живеење и дека ќе следи трајно преселување на жителите од најризичните зони. Иако ќе се направат дополнителни проценки откако водата ќе се повлече, експертите нагласуваат дека свлечиштето сè уште е активно.
Поради екстремните временски услови, италијанската влада прогласи вонредна состојба во неколку региони на југот на земјата. Иако се издвоени 100 милиони евра за итни интервенции, локалните власти предупредуваат дека реалните штети се далеку поголеми.
Жителите, пак, со револт потсетуваат дека опасноста била позната со децении, но никогаш не била сериозно решена.
