Во близина на трансформаторска станица на електрана во покраината Бранденбург во Германија е пронајдена поголема количина експлозив, а полицијата е на самото место.
Инцидентот е регистриран кај трансформаторската станица Турнов/Преилак, во близина на термоелектраната Јаншвалде на југот од Бранденбург. Според информациите, полицајците пронашле повеќе направи за ракети исполнети со експлозив, кои потоа биле деактивирани. Се верува дека станува збор за направи од рачна изработка.
Трансформаторската станица, како што се наведува, била погодена повеќепати. Се претпоставува дека целта на нападот била да се предизвика голем прекин на струјата во блиската термоелектрана на јаглен. Според првичните сознанија, до тоа сепак не дошло.
„Проверките се во тек“
Портпаролот на компанијата „Leag“, која управува со термоелектраната, изјави дека во инцидентот нема повредени меѓу вработените. Дополнителните проверки се во тек.
Од Полициската управа во Котбус соопштија дека комуникацијата во врска со случајот ја презела полициската управа во Потсдам, што беше потврдено и од Министерството за внатрешни работи на Бранденбург. Портпаролката на полицијата во Потсдам изјави дека во околината на една трансформаторска станица во округот Шпре-Најсе биле пронајдени неколку таканаречени неконвенционални експлозивни и запаливи направи.
Според нејзините зборови, претпладнето најпрво пристигнала пријава за можно оштетување на трансформаторската станица. Во ниту еден момент, како што се наведува, немало последици за населението. Истрагата е во тек.
