Во последните пет години, израелските воени сили и доселеници извршиле повеќе од 250 напади врз палестински водни извори, покажува ново истражување на американскиот тинк-тенк Pacific Institute од Калифорнија. Ова се смета за најинтензивна кампања против цивилната водна инфраструктура во поново време.
Според извештајот, за нападите биле користени бомби, кучиња, отров и тешка механизација, при што над 90 локации во Газа и на Западниот Брег биле целосно уништени или оштетени. Меѓу погодените системи се и оние за пиење, наводнување и санитарни цели, што предизвикало огромна хуманитарна катастрофа.
Во февруари 2024 година, осум Палестинци биле убиени од снајперисти додека собирале вода во близина на болницата Насер во Газа. Неколку месеци подоцна, во април, израелски воздушни напади погодиле две училишта, усмртувајќи и ранувајќи стотина лица, како и уништувајќи соларна постројка за десалинизација финансирана од Европската Унија.
Истражувањето открива дека околу 90% од водната инфраструктура во Газа е уништена или недостапна, што довело до тешка хуманитарна и здравствена криза.
Специјалниот известувач на ОН за правото на вода и санитарии, Педро Арохо-Агудо, изјави дека ваквите постапки претставуваат кршење на меѓународното право и можат да се квалификуваат како воен злостор или злостор против човештвото, додавајќи дека во случајот со Газа станува збор за дел од геноцидна стратегија.
„Израел систематски ја користи водата како средство за иселување и сегрегација на палестинското население,“ нагласува Арохо.
Примери на вакви акции не недостигаат – во април годинава, доселеници уништиле цевководи во селото Бардала и го оштетиле главниот водовод во близина на Хирбат, додека во јули израелски напади во бегалскиот камп Нусејрат усмртиле најмалку 10 Палестинци, меѓу кои шест деца.
Во текот на 2024 година, според Pacific Institute, се регистрирани 420 конфликти поврзани со вода ширум светот – зголемување од 20% во споредба со претходната година. Само во првата половина од 2025 година, бројот надминал 160 инциденти.
„Водата станува тивко оружје на современите војни,“ предупредува Питер Глик, коосновач на Pacific Institute. „Заштитата на цивилните системи за водоснабдување е од суштинско значење за да се спречи понатамошна ескалација на конфликтите.“
