Обвинителството на Босна и Херцеговина официјално побарало информации од властите во Молдавија во врска со наводите за постоење на руски кампови за обука во Република Српска. Ова е потврдено за медиумот „Детектор“, од каде објавија дека истрагата за аферата, во која руски инструктори наводно обучувале државјани на Молдавија на територијата на БиХ, и понатаму е активна.
Според писмениот одговор од Обвинителството, барањето до Молдавија било испратено преку институтот за меѓународна правна помош. „Обвинителството на БиХ пред неколку месеци се обрати до партнерските институции во Молдавија во врска со активностите на нивни државјани во БиХ и можни кривични дела“, стои во документот.
Иако не е наведено кога точно е испратено барањето, се потврдува дека досега не е добиен никаков одговор од молдавските власти. Оваа информација е значајна бидејќи ја потврдува активноста на истрагата што започна во јули 2025 година, откако беше објавено дека на територијата на Република Српска, кон крајот на 2024 година, биле откриени сомнителни кампови за обука.
Министерствата за правда и надворешни работи на Молдавија, според „Детектор“, не дале коментар на испратените прашања во врска со случајот.
Истражувањето кое заеднички го спроведоа „Детектор“ и молдавскиот медиум CU SENS открило вознемирувачки детали за организацијата и целите на камповите. Учесници во обуките изјавиле дека во околината на Бања Лука биле обучувани за организирање масовни протести и провоцирање на полицијата. Некои од инструкторите биле директно поврзувани со руската приватна воена група „Вагнер“, која е обвинета за бројни злосторства во Украина, Африка и Сирија.
Дополнително, на едно судење во Кишњев сведочел осуден убиец по име Владимир Харчевников, кој признал дека од Молдавија, преку Србија, пристигнал во БиХ. Тој објаснил дека таму бил дел од група што се занимавала со собирање, програмирање и калибрирање дронови, но и со изработка на „Молотови коктели“ и други техники за предизвикување немири.
Од страна на властите во Република Српска, како и од Амбасадата на Русија во БиХ, категорично се негирани сите обвинувања за постоење на такви кампови. Сепак, според информациите, истрагата во БиХ е сè уште во фаза на прибирање податоци и анализирање докази.
Во Молдавија, пак, процесите се веќе понапреднати. Таму се одржуваат судски рочишта на кои учесници од камповите откриваат нови детали за методите на обука и за локациите. На едно од тие рочишта било посочено дека обуките во БиХ се одржувале во селото Гламочани, северно од Бања Лука, во близина на поранешниот воен аеродром Залужани.
Во меѓувреме, во септември оваа година молдавската полиција уапси уште 74 лица, меѓу кои и лица за кои се верува дека се поврзани со криминални организации од Русија и дека имале задача да предизвикаат масовни нереди во земјата.
Истрагата продолжува, а јавноста со загриженост ги очекува резултатите што би можеле да откријат колку длабоко се протегала руската мрежа за влијание во регионот.
