Турската разузнавачка служба МИТ спроведе голема безбедносна операција во која беше разбиена наводна меѓународна шпионска мрежа, а седум лица се приведени во неколку истовремени акции низ земјата.
Според официјалните информации, операциите биле извршени во четири турски провинции, при што бил уапсен и наводниот водач на групата. Вкупно девет лица се идентификувани како дел од мрежата, но двајца од нив веќе се наоѓале во затвор по други постапки.
МИТ наведува дека групата била вклучена во собирање чувствителни податоци поврзани со невладини организации, здруженија, етнички заедници и државни функционери, кои потоа биле пренесувани на странски разузнавачки структури, без да се открие за кои служби станува збор.
Истрагата, според турските власти, била заснована на комбинација од физички надзор, кибернадзор и техничко прислушување, со што биле откриени активностите на осомничените.
Случајот се оценува како дел од пошироките напори за сузбивање на шпионски активности и заштита на националната безбедност.
