Австрија прогласи тројца руски дипломати за persona non grata, откако безбедносните служби открија „шума од антени“ на покривите на дипломатските згради во Виена. Според австриската влада, бројните сателитски антени инсталирани на објектите што ги користи руската држава, особено на станбениот комплекс за дипломатски персонал, можеле да се користат за пресретнување на комуникации и шпионажа.
„Неприфатливо е дипломатскиот имунитет да се користи за шпионажа,“ изјави министерката за надворешни работи Беате Мајнл-Рајцингер, потврдувајќи дека тројцата дипломати веќе ја напуштиле земјата. Со ова, бројот на протерани руски дипломати од Австрија од 2020 година се искачи на 14.
Руската амбасада во Виена реагираше остро, наведувајќи дека протераните дипломати се од амбасадата и од руската мисија во Организацијата за безбедност и соработка во Европа. Москва оцени дека одлуката на Австрија „не е со ништо оправдана“ и најави контрамерки.
Овој потег доаѓа во период на засилени тензии меѓу Западот и Русија, каде што дипломатските протерувања станаа честа практика. Австриската служба за внатрешна безбедност со години предупредуваше дека необичниот број антени може да се користи за пресретнување на сателитски сигнали, а сега сомнежите добија официјална потврда
