Научниците предупредуваат дека Њу Орлеанс ја достигнал „точката од која нема враќање“ и дека градот би можел да биде опкружен со море до крајот на векот. Според студија објавена во Nature Sustainability, зголемувањето на нивото на морето и забрзаната ерозија на мочуриштата во јужна Луизијана ќе доведат до постепено потопување на регионот.
Истражувачите проценуваат дека јужна Луизијана може да се соочи со пораст на морето од три до седум метри и губење на три четвртини од преостанатите мочуришта, што би го поместило брегот и до 100 километри навнатре. Ова директно ги загрозува Њу Орлеанс и Батон Руж, каде живеат стотици илјади луѓе.
Иако по ураганот Катрина во 2005 година беа инвестирани милијарди долари во брани и пумпи, научниците предупредуваат дека тие нема да бидат доволни на долг рок. „Њу Орлеанс е во терминална состојба, само е прашање колку време му преостанува,“ изјави еден од авторите од Универзитетот Тулан, нагласувајќи дека реалната временска рамка е неколку децении, а не векови.
Податоците покажуваат дека Луизијана веќе изгубила околу 5.180 квадратни километри крајбрежна линија од 1930-тите, а процесот на ерозија е толку брз што на секои 100 минути исчезнува површина со големина на фудбалско игралиште.
Авторите на студијата бараат властите да започнат со планирано преселување на населението, почнувајќи од најранливите заедници, и да развиваат инфраструктура во побезбедни области северно од Њу Орлеанс.
