Русија планира значително да го зголеми извозот на нафта користејќи модерни технологии за да ги заобиколи западните санкции, изјави портпаролот на Кремљ, Дмитриј Песков. Намалувањето на руските испораки за Индија може да биде само привремено, истакна тој, додавајќи дека земјата ќе продолжи да усовршува сопствени методи за трговија и логистика за време на санкциите.
– Можно е многу краток временски период да се забележи незначително намалување на обемот на трговијата со нафта, изјави Песков за индиските новинари, одговарајќи на прашања за влијанието на санкциите врз рускиот извоз.
Изјавата доаѓа пред дводневната посета на рускиот претседател Владимир Путин на Индија, кој се очекува да пристигне во Делхи во четврток. Индија, која е најголемиот купувач на руска нафта преку бродови, го намали увозот од Москва поради западните санкции, особено оние наметнати од Вашингтон на најголемите руски производители на нафта „Роснефт“ и „Лукоил“.
Русија останува најголем снабдувач на нафта за Индија, која е трет најголем увозник и потрошувач на нафта во светот.
– Москва работи на создавање „неопходна средина“ за купувачите кои ја бараат нејзината нафта, изјави Песков за време на видеоконференција организирана од руската агенција „Спутник“, пренесува ТАСС.
Тој потенцира дека Русија има богато искуство во работење во услови на санкции и дека поседува сопствени технологии за заобиколување на овие мерки. – Ќе продолжиме да ги усовршуваме овие технологии доколку санкциите продолжат, додаде портпаролот.
Песков нагласи дека трговијата меѓу Русија и Индија мора да биде заштитена од притисокот на трети страни, а деталите за начините на плаќање ќе бидат дел од разговорите меѓу Путин и индискиот премиер Нарендра Моди.
– Сметаме дека наметнатите санкции се незаконски според меѓународното право. Санкциите може да се сметаат за легитимни само доколку се одобрени од Советот за безбедност на ОН, заклучи Песков.
