Разорните земјотреси што ја погодија Венецуела не претставуваат класичен сеизмички настан, туку редок феномен познат како двојно пукање на раседот, објаснуваат сеизмолозите.
Според стручњаците, првиот земјотрес со јачина од 7,2 степени бил проследен со уште посилен потрес од 7,5 степени само 39 секунди подоцна. Наместо еден земјотрес, станувало збор за два одделни процеси на ослободување на енергијата, кои се случиле речиси истовремено.
Претседателот на Геофизичкиот институт на Перу, Ернандо Тавера, изјави дека ваквиот механизам е редок, но веќе е познат во сеизмологијата. Сличен феномен бил забележан и при катастрофалниот земјотрес во Писко, Перу, во 2007 година.
Поради краткиот временски интервал меѓу двата силни удари, жителите почувствувале речиси непрекинато и исклучително силно тресење на тлото. Дополнителен проблем е што објектите оштетени од првиот удар веднаш биле погодени од вториот, што значително ги зголемило разурнувањата.
По двата главни земјотреси биле регистрирани повеќе од 20 последователни потреси. Според најновите информации, бројот на жртви продолжува да расте, а илјадници лица се водат како исчезнати.
Експертите потсетуваат дека северниот дел на Венецуела се наоѓа во една од најактивните сеизмички зони во регионот, што дополнително го зголемува ризикот од вакви силни земјотреси.
