Речиси половина од вработените во Германија сакаат што поскоро да се пензионираат, покажува најновата анкета на здравственото осигурување DAK, во време кога германските власти размислуваат за постепено продолжување на работниот век.
Според резултатите од истражувањето, 44 проценти од испитаниците би сакале да заминат во пензија пред да ја достигнат законската старосна граница. Од друга страна, 35 проценти планираат да работат до исполнување на условите за пензија, а девет проценти би продолжиле да работат и по стекнувањето на тоа право.
Во вторник Германската пензиска комисија треба да разгледа предлог според кој возраста за пензионирање по 2031 година постепено би се усогласувала со растот на очекуваниот животен век. Истовремено, се предлага и укинување на можноста за предвремено пензионирање без намалување на пензијата по 45 години уплатени придонеси.
Иако во јавноста повторно се појавија тврдења за „работа до 70 години“, германските медиуми посочуваат дека таков конкретен предлог не постои, туку се разгледува автоматско приспособување на пензиската возраст во согласност со продолжувањето на животниот век.
Анкетата покажува дека желбата за порано пензионирање е особено изразена кај лицата постари од 50 години, од кои 52 проценти планираат предвремено да го напуштат пазарот на трудот. Како главна причина се наведува здравствената состојба.
Генералниот директор на DAK, Андреас Сторм, смета дека компаниите треба повеќе да инвестираат во здравствената поддршка на постарите работници за да им овозможат подолг и поквалитетен работен век.
Анкетата е спроведена од институтот Форса на примерок од 7.000 вработени, додека според официјалните податоци, во Германија во првиот квартал од 2026 година биле вработени околу 45,6 милиони луѓе.
