Продолжува размената на посмртните останки на загинати војници меѓу Украина и Русија, при што Украина прими 522 тела, додека Русија презеде останки на 33 свои државјани, јавуваат државните новински агенции.
Според достапните информации, од почетокот на 2025 година Русија вратила останки на повеќе од 20.000 украински државјани, додека од украинска страна биле предадени повеќе од 600 тела на руски државјани.
Медиумите наведуваат дека поради состојбата на фронтот и континуираните борби, украинските сили во многу случаи не биле во можност навреме да ги евакуираат телата на загинатите војници. Во текот на војната, и двете страни ретко објавуваат официјални податоци за своите воени загуби.
Според проценките што ги пренесува ДПА, украинските загуби се движат околу 190.000 загинати и исчезнати лица, додека руските се проценуваат на повеќе од 350.000.
Во меѓувреме, Обединетите нации соопштија дека од почетокот на руската инвазија во февруари 2022 година досега загинале повеќе од 16.100 цивили. Војната и понатаму продолжува, а дипломатските напори за трајно решение засега не донесоа прекин на конфликтот.
