Шпанската полиција успеа да ја пронајде шестгодишната девојчица на територија на Косово, за која се сомнева дека пред две недели била киднапирана од нејзиниот татко на Мајорка. Меѓународната полициска акција завршила со негово апсење од страна на косовската полиција, додека девојчето било ставено под заштита на надлежните служби.
Според „Ел Мундо“, девојчето е вратено на Мајорка и е во добро здравствено и психичко состојба, каде повторно е со својата мајка. Целата операција била спроведена под кодно име „Мост“, по пријава за исчезнување што ја поднела мајката.
Истрагата покажала дека бегството било внимателно планирано. Таткото наводно ја криел ќерката во багажник на автомобил за да ја пренесе преку траект од Мајорка, а потоа ја преминувал границата без да ја пријави.
Во текот на истрагата, полицијата открила дека осомничениот се обидел да ја збуни истрагата со испраќање на AirTag уред во Мароко, додека вистинското движење на детето било насочено кон други европски земји и на крај кон Косово.
Дополнително, истражителите утврдиле дека тој ги затворил банкарските сметки, ги избришал профилите на социјалните мрежи и постепено го менувал својот изглед за да избегне идентификација. Во меѓувреме биле проверувани снимки од безбедносни камери, финансиски трансакции и поморски линии од Мајорка, како и активирана меѓународна полициска соработка.
Издадена била европска потерница, а низ координирана акција на повеќе европски полициски служби, патот на осомничениот бил реконструиран сè до неговото лоцирање.
На крајот, косовската полиција го уапсила осомничениот, а девојчето било пронајдено и безбедно згрижено. Случајот предизвика силни реакции во јавноста, а истрагата за сите детали сè уште продолжува.
