Во индиската престолнина Њу Делхи вечерва се случи тешка експлозија во близина на еден од најпознатите историски споменици – Црвената тврдина (Red Fort). Според првичните информации на локалната полиција, осум лица загинале, а најмалку дваесет се повредени, откако патничко возило експлодирало додека чекало на семафор кај метро-станицата Лал Кила.
Инцидентот се случил околу 18:52 часот по локално време (13:22 GMT). Станува збор за автомобил марка Hyundai i20 во кој се наоѓале три лица. Само неколку секунди откако возилото запрело на црвено светло, се слушнала моќна детонација која предизвикала паника меѓу присутните.
Експлозијата избила во близина на пазарот Чандни Чоук, еден од најфреквентните делови на Делхи, кој секојдневно го посетуваат илјадници туристи. Сведоци опишале сцени на хаос и уништување, истакнувајќи дека „експлозијата била толку силна што стаклата на околните згради и на метро-станицата биле скршени“.
На местото на трагедијата веднаш пристигнал специјален тим за деминирање, а целиот реон е блокиран и ставен под строга полициска и воена контрола.
Портпаролот на полицијата, Санџај Тајаги, потврди дека истрагата е во тек, но причината за експлозијата сè уште не е утврдена. „Ги разгледуваме сите можни сценарија. Ќе биде потребна детална форензичка анализа пред да можеме да кажеме што точно се случило“, изјави Тајаги.
Министерот за внатрешни работи, Амит Шах, веднаш ја посети болницата Лок Најак (LNJP) каде што се згрижени повредените и најави дека утре ќе се одржи итен состанок со безбедносните служби. „Во овој момент не можеме да исклучиме ниту една можност. Земјата е во состојба на зголемена будност“, порача тој.
Индискиот премиер Нарендра Моди изрази длабоко сочувство до семејствата на загинатите и порача дека лично ја следи ситуацијата и бара од надлежните институции брзо расветлување на инцидентот.
По експлозијата, полицијата воспостави строги контроли на сите влезови во Њу Делхи, вклучително и на граничните премини со соседните сојузни држави. Се проверуваат сите возила, а центарот на градот е под висока безбедносна готовност.
Според првичните проценки, експлозијата не била предизвикана од сообраќаен судар, туку се работи за намерно активиран експлозивен уред – иако тоа засега не е официјално потврдено. Форензичките експерти и тимови од Националната гарда за безбедност (NSG) работат на терен и собираат докази.
Црвената тврдина, историски објект од 17 век, е еден од најголемите симболи на Индија, што го прави овој напад уште потресен и значаен. Илјадници граѓани стравуваат дека станува збор за координиран напад, а јавноста очекува одговори во најбрз можен рок.
