Американскиот претседател Доналд Трамп повторно се најде во центарот на вниманието поради уште еден дипломатски гаф, откако го пофалил претседателот на Либерија, Џозеф Боакаи, за неговото „совршено“ познавање на англискиот јазик – не знаејќи дека англискиот е службен јазик во неговата земја.
Инцидентот се случил за време на состанок во Белата куќа со неколку африкански лидери. Додека Боакаи зборувал на англиски и упатил повик за поголеми американски инвестиции во Либерија, Трамп, видливо импресиониран, го прашал: „Каде научивте да зборувате толку прекрасно? Каде сте се образувале? Во Либерија?“ Боакаи со блага насмевка одговорил: „Да, господине.“
Трамп потоа продолжил: „Тоа е многу интересно, прекрасен англиски. Имам луѓе на оваа маса кои не зборуваат англиски ни приближно толку добро.“
Оваа сцена веднаш се прошири на интернет, предизвикувајќи лавина коментари и шеги на социјалните мрежи.
Историски гледано, Либерија е основана како американска колонија во 1822 година од страна на Американското друштво за колонизација, кое сметало дека ослободените црнци од Америка ќе имаат подобра иднина во Африка. Илјадници Афроамериканци биле преселени таму, а земјата прогласила независност во 1847 година. Поради ваквата историја, англискиот станал и останал официјален јазик на Либерија.
Иако коментарот на Трамп се доживеа како смешка, аналитичарите предупредуваат дека недоволното познавање на историски и културни факти од страна на светските лидери може да доведе до дипломатски недоразбирања и непочитување на други народи.
Овој случај, иако на прв поглед безазлен, е потсетник дека дури и едно едноставно прашање може да разоткрие сериозна неинформираност – особено кога доаѓа од лидер на глобална сила.
