Според извештај на „Блумберг“, во Русија расте загриженоста дека по изборите за Државната дума би можело да следи нов бран мобилизација. Агенцијата, повикувајќи се на документи до кои дошла, наведува дека стравувањата се присутни и меѓу дел од претставниците на руската власт и вработени во центрите за регрутација.
Според овие наводи, некои високи руски функционери во изминатите месеци се обидувале да отворат банкарски сметки во странство и да префрлат дел од својот имот надвор од земјата. Воедно, наводно ги советувале своите пријатели и роднини да ја напуштат Русија. Слични активности, според „Блумберг“, преземале и дел од вработените во воените центри за регрутација.
Еден европски безбедносен функционер за агенцијата изјавил дека Русија се подготвува до крајот на годината да обезбеди дополнителни 300.000 луѓе за армијата. Сепак, во извештајот се наведува дека Владимир Путин сè уште нема донесено конечна одлука за нова мобилизација.
Москва категорично ги отфрла ваквите тврдења. Портпаролот на Кремљ, Дмитриј Песков, денеска изјави дека Русија нема план до крајот на 2026 година да мобилизира 300.000 лица. Путин претходно исто така тврдеше дека во моментов нема сценарио поради кое би била потребна нова мобилизација и дека потребите на армијата се пополнуваат со доброволци и војници под договор.
За разлика од делумната мобилизација во септември 2022 година, евентуалното ново регрутирање би можело да се спроведува преку значително поразвиена дигитална инфраструктура. Русија во меѓувреме воспостави Единствен воен регистар поврзан со повеќе државни бази на податоци, а електронските повици овозможуваат автоматско активирање на одредени ограничувања за лицата што ќе бидат повикани.
Засега, информацијата за подготовка на нова мобилизација останува тврдење базирано на извори и документи цитирани од „Блумберг“, додека Кремљ официјално ја негира.
