Неколку земји од Европската унија разгледуваат нов предлог со кој би се формирале специјални центри надвор од територијата на ЕУ, каде би биле сместувани мигранти кои немаат право на престој и чекаат депортација во своите матични земји.
Според информациите, иницијативата ја предводат Данска, Австрија, Грција, Германија и Холандија, а првите договори би можеле да бидат постигнати во текот на годинава, со цел центрите да почнат со работа околу 2027 година.
Како потенцијални локации се спомнуваат Руанда, Уганда и Узбекистан, додека земји поблиску до Европа, како Египет и Либија, се исклучени поради страв дека би можеле да станат нови рути за шверц на луѓе.
Според новиот модел, центрите би служеле за лица чии барања за азил се веќе одбиени и кои чекаат враќање во своите матични држави. Овој пристап се разликува од претходните предлози на некои европски држави, кои се однесуваа и на новопристигнати мигранти.
Предлогот веќе предизвика поделени реакции меѓу земјите членки и жестоки критики во јавноста, а дебатата околу миграциската политика во ЕУ повторно се засилува.
