Финалето на Светското првенство 2026 не донесе само драматична борба за титулата меѓу Шпанија и Аргентина, туку и историски момент кој засекогаш ќе остане запаметен. За првпат во историјата на Мундијалите, полувремето беше претворено во спектакуларен музички концерт, по примерот на легендарното шоу на американскиот Супербоул.
На специјално поставената сцена на стадионот во Њу Џерси настапија некои од најголемите светски музички имиња, меѓу кои Мадона, Шакира, Џастин Бибер, јужнокорејската група BTS и нигериската ѕвезда Burna Boy.
Историското шоу траеше околу 11 минути, но поради поставувањето и демонтажата на сцената, паузата на финалето беше продолжена на околу 27 минути. За креативниот концепт и организацијата на настапите бил задолжен фронтменот на Coldplay, Крис Мартин.
Спектаклот започна со Мадона, која го отвори шоуто со својот хит „Music“, пристигнувајќи на сцената во возило управувано од бразилските фудбалски легенди Роналдо и Роналдињо.
Потоа следуваше необична изведба на култната „Seven Nation Army“, во која диригентот Густаво Дудамел настапи заедно со оркестар и членовите на Electric Mayhem од „The Muppets“.
Публиката дополнително ја крена атмосферата кога BTS го изведе светскиот хит „Dynamite“, додека Џастин Бибер донесе поемотивен момент со акустична изведба на „Everything Hallelujah“. Неговото појавување беше најавено од актерите од популарната серија „Ted Lasso“.
Еден од највпечатливите моменти беше настапот на Шакира и Burna Boy, кои заедно ја изведоа официјалната песна на Светското првенство „Dai Dai“. За Шакира ова беше уште едно значајно појавување на Мундијал, откако нејзината „Waka Waka“ стана симбол на Светското првенство во Јужна Африка во 2010 година.
Финалето на шоуто донесе уште поголем спектакл. На сцената им се придружија Крис Мартин, детскиот хор PS22, како и ликовите од „Sesame Street“ и „The Muppets“, а целата кореографија заврши со огромниот натпис „LOVE“ и визуелна проекција на планетата Земја.
Иако продукцијата доби бројни пофалби, одлуката паузата да биде продолжена од вообичаените 15 на 27 минути предизвика поделени реакции кај дел од љубителите на фудбалот. Според критичарите, толку долг прекин можел да влијае врз ритамот на играта и концентрацијата на фудбалерите.
Од ФИФА, пак, претходно објаснија дека дополнителното време било неопходно поради комплексната сценографија и безбедното поставување и отстранување на сцената, а правилата дозволувале вакво продолжување на паузата.
За разлика од претходните Светски првенства, каде што имаше само кратки забавни програми пред почетокот на финалето, ова е првпат музички спектакл да се одржи за време на самото полувреме.
Со овој потег, ФИФА воведе концепт кој со години е заштитен знак на Супербоулот, а според интересот на публиката и реакциите ширум светот, ваквиот формат би можел да стане традиција и на идните финалиња на Светските првенства.
Покрај забавниот дел, програмата имаше и хуманитарна цел. Настанот беше поврзан со фондот на ФИФА и организацијата „Global Citizen“, кои работат на подобрување на образованието и пристапот до спорт за децата ширум светот.
По завршувањето на спектаклот, вниманието повторно се префрли на теренот, каде Шпанија ја совлада Аргентина со 1:0 по продолженијата и ја освои својата втора светска титула во историјата.
