Во спектакуларно издание на Скопскиот атлетски маратон, македонскиот атлетичар Дарио Ивановски приреди вистинска сензација! Во драматичен финиш, само два километри пред целта, тој го престигна фаворизираниот Кениец Џулиус Кипкоеч и ја освои највисоката позиција на подиумот со време од 2 часа, 14 минути и 50 секунди.
Ова е втора голема победа за Ивановски на Скопскиот маратон – првата ја забележа во 2021 година, а со денешниот триумф ја потврди својата доминација, станувајќи и балкански и национален шампион.
„Најважно ми е да ги бранам боите на Македонија. Благодарен сум на сите што беа со мене и кога победував и кога паѓав. Сакам сите да знаат дека и во Македонија има победници“, изјави Ивановски по трката, не криејќи ја радоста.
Во женска конкуренција, пак, Кенијката Ирине Черуто ја потврди својата форма и победи втора година по ред со време од 2:38:31 часа.
Оваа година, Скопскиот маратон го прослави своето 21-во издание со рекорден број учесници — над 14.000 тркачи од 58 земји го преплавија главниот град, претворајќи го Скопје во сцена на спортска магија и гордост за Македонија.
