Меѓународната фудбалска федерација (ФИФА) започна дисциплинска постапка против аргентинската репрезентација по инцидентите што се случија по завршувањето на финалето на Светското првенство, во кое Шпанија ја совлада Аргентина со 1:0 по продолженија и ја освои светската титула.
По последниот судиски свиреж на теренот избувнаа тензии меѓу играчите и членовите на стручните штабови на двете селекции. Дисциплинската комисија на ФИФА ќе ги анализира судискиот извештај, официјалната документација и видео-снимките пред да донесе одлука за евентуални санкции.
Во фокусот на истрагата е аргентинскиот репрезентативец Леандро Паредес, кој доби црвен картон поради насилно однесување по завршувањето на натпреварот. Под истрага е и Нахуел Молина поради наводен вербален конфликт со капитенот на Шпанија, Родри, додека помошникот-селектор Роберто Ајала исто така може да се соочи со дисциплински мерки поради неговата наводна вмешаност во инцидентот.
ФИФА ќе го разгледува и однесувањето на аргентинските фудбалери за време на церемонијата на доделување на трофејот, откако според извештаите дел од нив го свртеле грбот додека Шпанија го прославувала освојувањето на титулата.
Засега не е познато какви санкции би можеле да бидат изречени, а одлуката се очекува во наредните недели. Аргентина претходно веќе беше предмет на истрага на ФИФА и по полуфиналниот натпревар против Англија, поради истакнување политички транспарент.
