Скопската Зоолошка градина добива нов изглед преку активности за обнова и модернизација на постојните објекти, подобрување на живеалиштата и создавање нови содржини за посетителите.
Градоначалникот на Град Скопје, Орце Ѓорѓиевски, соопшти дека интензивно се работи на подобрување на условите за животните, како и на уредување на просторот за посетителите и вработените.
Според Ѓорѓиевски, во изминатиот период биле заменети крововите, поставени нови огради кај лавовите и дополнителни заштитни огради.
Изграден е и моторички парк за најмладите, додека во тек е обновата на платото пред Зоолошката градина.
Градоначалникот најави дека активностите ќе продолжат со изградба и приспособување на живеалиштата, како и со планови за збогатување на животинскиот свет со нови видови.
„Скопје заслужува Зоолошка градина со која ќе се гордее, а животните заслужуваат квалитетни услови, стручна грижа и достоинствен третман“, порача Ѓорѓиевски.
Целта, според него, е ЗОО Скопје да прерасне во водечки центар за едукација, заштита на природата и хуман третман на животните.
Посебно значење на обновата ѝ дава фактот што Зоолошката градина овој месец одбележува 100 години од своето постоење.
Ѓорѓиевски нагласи дека јубилејот го одбележуваат со конкретни активности и решителност модернизацијата да продолжи.
„Заедно ја градиме иднината на ЗОО Скопје, со цел да биде една од најдобрите зоолошки градини на овие простори“, порача скопскиот градоначалник.
