Градоначалникот на Скопје, Орце Ѓорѓиевски, најави почеток на широка акција за реконструкција на пешачките патеки во градот со цел подобрување на безбедноста, функционалноста и уреденоста на јавниот простор.
Првата активност започна на булеварот „Партизански одреди“, на потегот од мостот „Обединети нации“ до пешачкиот мост „Влае“, каде што се реконструира површина од 1.200 м².
„Оваа делница добива целосно нов лик – пешачка патека широка 4 метри, комплетно реконструирана и современо уредена, со нова подлога, подобрена пристапност, уредени рабници и зголемена безбедност за сите учесници во сообраќајот“, напиша Ѓорѓиевски на својот Фејсбук профил.
Според градоначалникот, оваа зона била меѓу најбараните од граѓаните поради долгогодишните проблеми и големата фреквенција на пешаците. „Со оваа интервенција, конечно ставаме крај на сликите на запуштеност и небезбедност. Ваквите слики стануваат минато“, истакна Ѓорѓиевски.
Градот најавува дека акцијата ќе продолжи со реконструкција на пешачките патеки, велосипедската инфраструктура и воведување на нови урбани решенија, со цел создавање функционален и уреден град кој ги става граѓаните на прво место.
