Град Скопје и Министерството за транспорт планираат воведување интегриран билет со кој граѓаните ќе можат да користат различни видови јавен превоз без одделно плаќање за секое превозно средство.
Ова го најави градоначалникот на Скопје, Орце Ѓорѓиевски, кој очекува системот да биде подготвен до средината на следната година.
Идејата е патниците да можат да комбинираат железнички и автобуски превоз со еден билет, наместо при секое префрлање да купуваат нов.
„Да не се симнувате од воз, а сте платиле 40 денари, па се качите во автобус да платите уште 35 денари. Со еден билет да можеш да се качиш од Зелениково, да отидеш до Ѓорче Петров“, објасни Ѓорѓиевски во емисијата „Ноќно студио“ на 4ТВ.
Според градоначалникот, ваквиот модел треба да им овозможи на граѓаните поедноставно и поефикасно патување, со помалку губење време и пониски вкупни трошоци за превоз.
„Треба како систем да го изработиме во наредниот период и верувам дека некаде до средината на наредната година би имале резултат“, рече Ѓорѓиевски.
Интегрираниот билет засега е најавен проект, а не веќе воведена услуга. Допрва треба да бидат разработени системот, начинот на наплата, цената на билетот и деталите за неговото користење.
