Една од најголемите балкански музички ѕвезди, Драгана Мирковиќ, за првпат јавно проговори за вистинските причини поради кои во деведесеттите години решила да ја напушти Србија и да го продолжи животот во Австрија.
Иако со години во јавноста се шпекулираше дека преселбата била мотивирана од љубовни причини, пејачката откри дека зад нејзината одлука стоеле многу потешки и поболни околности.
Во гостување во поткаст, Мирковиќ се присети на периодот од деведесеттите години, кој го опиша како еден од најтешките во нејзиниот живот. Според неа, во тоа време била исклучително популарна и успешна, што ја направило мета на луѓе од криминалното подземје.
„Сакам да ги заборавам деведесеттите. Тоа беа многу тешки години. Бев млада, популарна и постојано бев под притисок. Морав да избегам од таа средина и да се засолнам на друго место“, открила пејачката.
Таа раскажала дека поради својата популарност и финансиски успех често се соочувала со притисоци и обиди за контрола на нејзиниот живот. Според неа, ситуацијата достигнала точка кога почувствувала дека единствениот начин да ја зачува својата слобода е да ја напушти земјата.
Мирковиќ нагласила дека никогаш не прифаќала уцени и не дозволувала други да носат одлуки во нејзино име, без разлика на цената што требало да ја плати.
Пејачката откри дека во еден момент била подготвена дури и целосно да се откаже од музичката кариера, само за да избегне притисоци и да продолжи да живее по сопствени правила.
Нејзината искрена исповед предизвика бројни реакции во јавноста, бидејќи за првпат детално зборува за периодот кој со децении остануваше обвиткан со шпекулации и недоречени приказни.
