Британската актерка и комичарка Луси Дејвис, позната по улогата на рецепционерката во британската верзија на серијата „The Office“, јавно проговори за тешката здравствена битка која извесно време ја чувала во приватност.
Дејвис откри дека пред околу година и пол ѝ бил дијагностициран рак на дојката во четврти стадиум. Болеста во меѓувреме се проширила и на други делови од телото, меѓу кои ’рбетот, десниот колк и ребрата.
Актерката ја сподели информацијата преку емотивна објава на Инстаграм, придружена со видео и подолга порака во која за првпат јавно ја раскажала својата приказна и начинот на кој се обидува да се справи со ситуацијата.
Дејвис објаснила дека одреден период ја чувала дијагнозата за себе, но во одреден момент почувствувала дека е време јавно да зборува за тоа низ што поминува.
Според нејзиното сведоштво, првиот знак што го забележала не бил типична грутка. Таа почувствувала мало задебелување, кое било толку суптилно што, како што самата признава, за малку воопшто немало да побара медицинска проверка.
Токму ова искуство ја поттикнало да испрати важна порака до своите следбеници – необичните промени во телото не треба да се занемаруваат и треба да се проверат кај лекар.
Во својата објава Дејвис навела дека болеста денес е во напредна фаза и дека, според информациите што ги споделила, ракот е неизлечив.
И покрај исклучително тешката ситуација, актерката вели дека се обидува времето што го има да го помине на начин кој за неа е исполнет со смеа, љубов и позитивни моменти. Таа објаснила дека отсекогаш се обидувала да најде нешто поучно дури и во најтешките ситуации, а тоа го прави и сега.
Болеста значително влијаела и врз нејзината подвижност. Дејвис открила дека понекогаш има потешкотии со подолго стоење и одење, а во одредени ситуации користи и инвалидска количка.
Сепак, хуморот останал важен дел од начинот на кој се справува со секојдневието. Таа посочила дека од своите пријатели и семејството побарала да продолжат да се шегуваат со неа и, пред сè, да не се однесуваат кон неа како кон личност која треба да биде дефинирана единствено преку болеста.
Дејвис исто така открила дека не чувствува страв од она што следува и дека ја прифатила својата ситуација. Најголемата емоционална тежина, како што објаснила, ја чувствува поради своето семејство, бидејќи смета дека за блиските ова искуство може да биде уште потешко.
И покрај дијагнозата, актерката не се откажува од работите што ѝ се важни. Таа сака да продолжи со активностите поврзани со заштитата на животните, но има и желба повторно да се врати на актерската работа.
Глумата, како што истакнала, е една од најголемите радости во нејзиниот живот и смета дека сè уште е способна да работи. Со тоа испраќа порака дека, и покрај сериозната здравствена состојба, не сака нејзиниот живот да биде сведен само на дијагнозата.
На крајот од својата објава, Дејвис им се обратила и на луѓето кои минуваат низ слични тешки животни ситуации, нагласувајќи дека секој човек има свој начин на справување со болеста и предизвиците што ги носи таа.
Луси Дејвис стекна голема популарност со улогата на рецепционерката во британската верзија на „The Office“, во која настапуваше од 2001 до 2003 година. Таа е позната и по улогата на тетка Хилда во серијата „The Chilling Adventures of Sabrina“, како и по настапот во филмот „Shaun of the Dead“ од 2004 година.
На големото платно последен пат се појави во „Wonder Woman“ од 2017 година. Сега, покрај борбата со тешката болест, нејзината желба останува да продолжи со работите што ги сака и повторно да се посвети на актерството доколку нејзината здравствена состојба го дозволи тоа.
