Двајца лекари се уапсени во Атина во рамки на истрагата за смртта на познатиот грчки пејач Ѓоргос Мазонакис, кој почина на 54-годишна возраст откако доживеал срцев застој во приватна ординација во атинската населба Колонаки.
Според грчките медиуми, против лекарот и лекарката е поднесена кривична пријава поради сомнежи поврзани со изложување на опасност со смртен исход. Тие треба да бидат изведени пред обвинител.
Истрагата е насочена кон последните часови пред смртта на пејачот, особено кон временската линија на настаните и можните несогласувања меѓу исказите на медицинскиот персонал и досега собраните докази.
Лекарите наводно тврделе дека плазмаферезата не била започната пред наглото влошување на состојбата на Мазонакис. Сепак, припадници на итната медицинска помош, според грчките медиуми, изјавиле дека при нивното пристигнување апаратот бил во функција.
Полицијата сега го проверува времето на пристигнување на Мазонакис во ординацијата, како и моментот кога била повикана итната медицинска помош. Според досегашните информации, апаратот при последното користење бил активен околу 45 минути.
При претресот на ординацијата биле пронајдени два апарати за плазмафереза. Полицијата, заедно со претставници на Лекарската комора на Атина, проверува дали биле исполнети сите законски и медицински услови за нивната употреба.
Претседателот на Лекарската комора на Атина, Ѓоргос Патулис, посочил дека плазмаферезата е сложена медицинска процедура за која се потребни соодветно обучен персонал и услови што овозможуваат итна реакција доколку дојде до компликации.
Адвокатот на двајцата лекари ги отфрла сомнежите и тврди дека ординацијата работела во согласност со законските прописи, како и дека медицинските апарати биле пријавени кај надлежните институции.
Во истрагата е вклучен и грчкиот министер за здравство Адонис Георгиадис, кој побарал да се проверат условите во кои работела ординацијата. Според неговите претходни изјави, објектот бил регистриран како интернистичка ординација, а не како клиника.
Од ординацијата биле одземени медицинска документација, електронски уреди, медицински производи и друг материјал. Дел од доказите биле обезбедени и при претресите на домовите на двајцата лекари.
Клучни одговори за причината за смртта треба да даде обдукцијата, која по барање на семејството била одложена за петок. Се очекува обдукцискиот наод да помогне да се утврди причината за срцевиот застој и дали постои поврзаност со медицинската постапка.
Семејството на Мазонакис преку адвокат соопшти дека ја поддржува постапката за целосно расветлување на сите околности под кои починал пејачот.
Ѓоргос Мазонакис повеќе од три децении беше едно од најпознатите имиња на грчката музичка сцена, а во последните години беше познат и како член на жирито на „The Voice of Greece“.
