Британски истражувачи развија стетоскоп со вештачка интелигенција кој може да открие три сериозни срцеви заболувања за само неколку секунди. Овој модерен уред, со големина на карта за играње, користи микрофон за анализа на суптилни разлики во отчукувањата на срцето и протокот на крв, нешто што човечкото уво не може да го детектира.
Стетоскопот прави електрокардиограм (ЕКГ) и ги испраќа податоците во облак, каде вештачката интелигенција, обучена на податоци од десетици илјади пациенти, ги обработува за да открие срцева слабост, абнормални срцеви ритми и заболување на срцевите залистоци.
Во студијата на Кралскиот колеџ во Лондон и NHS Trust, опфатени беа над 12.000 пациенти од 96 ординации на матични лекари кои користеле AI стетоскопи од фирмата Eko Health, а резултатите беа споредени со 109 ординации каде што не бил користен уредот. Пациентите со срцева слабост имале 2,33 пати поголема веројатност да бидат дијагностицирани во рок од 12 месеци, абнормалните срцеви ритми биле откриени 3,5 пати побрзо, додека заболувањата на залистоците биле 1,9 пати почесто идентификувани.
Д-р Соња Бабу-Нарајан, клинички директор во Британската фондација за срце, нагласува дека ова е пример како класичниот стетоскоп може да се надгради за 21 век и да овозможи порано откривање на срцеви болести, што значително го подобрува пристапот до третманот и шансите за живот.
Плановите се да се воведат AI стетоскопите кај матичните лекари во јужен Лондон, Сасекс и Велс, со цел да се револуционизира раната дијагноза на срцеви заболувања.
