Израелската армија денеска повторно изврши силен воздушен напад во градот Газа, уништувајќи 15-катна станбена кула. Пред нападот, жителите биле повикани да ја напуштат областа, а кратко потоа зградата се урна во огромен облак од прав и урнатини.
Во соопштение од армијата се наведува дека цел на ударот бил ракетен фрлач на Хамас. Според очевидци, урнатата кула Суси се наоѓала во истата зона за евакуација како и кулата Руџа, за која Израелците веќе најавија дека ќе биде наредната цел.
На социјалните мрежи експлозијата и моментот на уривање станаа вирални. Израелскиот министер за одбрана Израел Кац објави снимка од нападот на платформата Х со порака: „Продолжуваме“. Пред неколку дена, по уништување на друга зграда во западен Газа, тој напиша: „Почнавме“.
Во моментов нема информации дали во нападот имало жртви.
