Протеините во последните години станаа еден од главните симболи на здравата исхрана, но нов преглед на повеќе од 350 претходно објавени истражувања укажува дека претераниот внес можеби не е идеален за секого.
Научниците утврдиле дека умереното намалување на протеините кај одредени луѓе може позитивно да влијае врз метаболизмот, воспалителните процеси и механизмите преку кои клетките ги отстрануваат оштетените делови.
Истражувањата на животни покажале дека исхраната со помалку протеини во одредени случаи била поврзана и со подолг животен век. Кај луѓето засега постојат главно краткорочни резултати кои покажуваат подобрување на одредени метаболички параметри, па научниците предупредуваат дека сè уште нема доволно докази дека намалувањето на протеините директно го продолжува човечкиот живот.
Едно од можните објаснувања е дека големиот внес на протеини ги активира клеточните механизми задолжени за раст и создавање ново ткиво. Кога тие сигнали постојано се активни, клетките потенцијално располагаат со помалку ресурси за сопствено „чистење“ и поправка на оштетувањата.
Во фокусот на научниците е и хормонот FGF21, чие ниво се зголемува кога организмот добива помалку протеини. Тој учествува во регулирањето на метаболизмот, потрошувачката на енергија и воспалителните процеси.
Сепак, важна е не само количината, туку и изворот на протеините. Истражувањата го поврзуваат поголемиот внес на растителни протеини од грав, леќа, наут, јаткасти плодови и семиња со подобри показатели за здраво стареење.
Научниците посебно нагласуваат дека резултатите не значат дека сите треба да го намалат внесот на протеини. На постарите лица, спортистите, бремените жени, децата и адолесцентите, како и на луѓето кои закрепнуваат од болест, операција или повреда, може да им бидат потребни поголеми количества.
Проблематична, според истражувачите, би можела да биде комбинацијата од исклучително висок внес на протеини и недоволна физичка активност, а не протеините сами по себе.
