Светската здравствена организација (СЗО) ја разобличи долгогодишната заблуда дека вакцините можат да предизвикаат аутизам. Комитетот за безбедност на вакцините при СЗО ја разгледал најновата научна анализа, која опфаќа сите релевантни студии од 2010 до август 2025 година, и јасно потврди дека нема никаква причинско-последична врска меѓу вакцините и нарушувањата од аутистичниот спектар.
Анализата ги вклучува и вакцините кои содржат тиомерсал, конзерванс на база на жива, за кој долго време се тврдело дека придонесува за развој на аутизмот. Од вкупно 31 научна студија, 20 не покажале никаква поврзаност, додека 11 студии кои наводно укажувале на ризик биле оценети како методолошки слаби и со висок ризик од пристрасност.
СЗО потенцира дека научните докази континуирано и убедливо покажуваат дека вакцините се безбедни и не предизвикуваат аутизам. Ова соопштение доаѓа по зголемениот јавен интерес и контроверзни изјави на јавни личности кои предизвикаа паника околу безбедноста на вакцините.
„Научните податоци се јасни – вакцините го спасуваат здравјето и не се поврзани со аутизмот“, истакна Комитетот за безбедност на вакцините при СЗО.
