Во Кина се забележува нов технолошки бум што го спојува светот на забавата со напредната вештачка интелигенција. Домашните гиганти како „Хуавеј технологии“, „ЈД.ком“ и „УБТек“ активно го развиваат секторот на интерактивни роботи и „паметни“ играчки, кој до крајот на деценијата би можел да достигне вредност од милијарди долари. Овој тренд не е само резултат на побарувачката за играчки, туку и дел од поширока технолошка и деловна еволуција која ја поставува Кина на глобалната сцена.
Компанијата „Хуавеј“ неодамна ја претстави играчката „Смарт Хана“, интерактивна кадифена играчка со препознавање на движења, гласовни команди и допир, која овозможува значително повеќе од традиционалното пасивно играње. Во првата недела биле продадени над 10.000 единици, што ја покажува растечката заинтересираност на пазарот за „паметна“ забава. Уредот е интегриран со екосистемот на „Хуавеј“ и го користи нивниот гласовен асистент „Шаои“, овозможувајќи поинтерактивен разговор со корисникот.
Истражувањата предвидуваат дека глобалниот пазар на играчки со вештачка интелигенција би можел да достигне 60 милијарди долари до 2033 година, што е голем раст од 18 милијарди долари во 2024 година. Кинескиот пазар, кој минатата година вредеше околу 3,5 милијарди долари, расте многу побрзо од традиционалниот сектор за играчки.
Стратегиите на кинеските технолошки компании не се ограничуваат само на класични играчки, туку опфаќаат холограми, говорни роботи и агенти на вештачка интелигенција кои нудат емоционална поддршка и помош во учењето.
„Паметните“ играчки и роботи со вештачка интелигенција веќе не се само модна нишка, туку претставуваат рана фаза на концепт каде што вештачката интелигенција преминува од индустриски и деловни апликации во домовите и секојдневниот живот на потрошувачите низ светот.
