Летото полека го отстапува местото на посвежите утра, пократките денови и есенската атмосфера. Иако температурите сè уште можат да потсетуваат на летните денови, календарски пристигнува новото годишно време.
Утре, 22 септември, започнува астрономската есен. Со есенската рамноденица денот и ноќта се приближно еднакви по должина, а во периодот што следува деновите постепено ќе стануваат пократки, а ноќите подолги.
Доаѓањето на есента традиционално значи враќање на јакните, џемперите и затворените обувки, но и на топлите напитоци и јадења. Пазарите во овој период се полни со пиперки, домати и друг сезонски зеленчук, а во многу домови веќе се подготвуваат ајвар, лутеница, печени пиперки, кисели краставички, слатко и компоти.
За многумина подготовката на зимница е повеќе од подготовка на храна за студените месеци – таа е традиција која потсетува на семејните собирања и рецептите што се пренесуваат од генерација на генерација.
Со есента постепено се менува и секојдневниот ритам. Следува период на подготовка на домовите за постудените денови, проверка на греењето и враќање на зимската гардероба во плакарите.
Во природата промената ќе биде сè повидлива – листовите ќе ги менуваат боите, утрата ќе стануваат посвежи, а сонцето ќе заоѓа сè порано.
Летните температури можат да се задржат уште извесен период и да донесат топли и сончеви денови, но утре официјално започнува новата сезона.
