По повод Светскиот ден на извидништвото, во Велес по четврти пат се одржа традиционална крводарителска акција, со што уште еднаш беше потврдена посветеноста на заедницата кон хуманоста и солидарноста.
Акцијата беше организирана од Црвен крст на Република Северна Македонија – Општинска организација Велес и Извиднички одред „Димитар Влахов“. Во рамки на настанот беа дарувани вкупно 45 крвни единици, со што значително се придонесе кон обезбедување на неопходните резерви за пациентите на кои им е потребна крв.
Особено значајно е што петмина граѓани за првпат даруваа крв, приклучувајќи се кон, како што истакнаа организаторите, „најхуманото семејство“ во државата. Овој податок е показател дека свеста за важноста на крводарувањето континуирано расте, особено меѓу младите.
Во реализацијата на акцијата активно учествуваа членови на Клубот на млади при Општинската организација на Црвен крст – Велес, извидници од одредот „Димитар Влахов“, како и стручна екипа од Институт за трансфузиона медицина, која ја спроведе постапката на дарување согласно медицинските стандарди.
Организаторите најавија дека и во иднина ќе продолжат со вакви иницијативи, со цел поттикнување на хуманите вредности и обезбедување стабилни резерви на крв.
