Интересот за вакцинација против сезонски грип во земјава континуирано расте, соопшти Министерството за здравство. Досега се пријавени над 70.000 граѓани, а повеќе од 22.000 лица веќе се вакцинирани на различни пунктови низ државата.
„Вакцинацијата се спроведува на 35 вакцинални пунктови, од кои пет се во Скопје. Сите заинтересирани можат да се пријават преку апликацијата vakcinacija.mk или преку својот матичен лекар“, истакнуваат од Министерството.
Бесплатната вакцинација е наменета за ризичните категории население, меѓу кои: лица над 65 години, лица со хронични заболувања, здравствени работници, бремени жени, деца од 6 месеци до 5 години, како и лица и вработени во установи за социјална заштита на стари лица.
Министерството ги повикува сите кои спаѓаат во ризичните групи да се вакцинираат навремено и да ја заштитат својата и здравјето на другите.
