Жесток случај на семејно насилство ја потресе скопската населба Драчево. Основното јавно обвинителство Скопје поведе постапка против 28-годишен маж, кој е осомничен дека ја претепал својата четиригодишна ќерка.
Според обвинението, инцидентот се случил во семејниот дом додека мајката приготвувала јадење, а девојчето си играло со своите сестри. Во еден момент, се качило на креветот за да ги земе играчките, што го разлутило таткото. Тој започнал да ја удира со шлаканици по лицето, нанесувајќи ѝ набиеница на главата и видливи повреди на кожата. Освен тоа, ја заплашувал со зборовите дека ќе ја убие.
Обвинителството посочува дека осомничениот и претходно покажувал агресивно однесување кон семејството, а сега постои сериозен ризик да го повтори насилството. Постои и опасност од бегство, со цел избегнување на кривичната одговорност.
Поради сето тоа, обвинителството побара од судот да му одреди мерка притвор. Случајот е во фаза на понатамошна постапка.
