Православните христијани утре го одбележуваат големиот христијански празник Вознесение Христово, меѓу народот познат како Спасовден. Станува збор за еден од најзначајните празници во православната традиција, кој секоја година се празнува во четврток, точно 40 дена по Велигден.
Според христијанското учење, по своето воскресение Исус Христос четириесет дена им се јавувал на своите ученици, разговарал со нив и ги подготвувал за нивната иднина мисија, говорејќи им за Божјото царство и верата.
Во овој период, сè до самиот празник Вознесение Христово, верниците традиционално продолжуваат да се поздравуваат со познатиот поздрав:
„Христос воскресе“,
на што се одговара:
„Воистину воскресе“.
Според Светото писмо, пред своето вознесение Христос им дал важни пораки и завети на своите ученици. Тој им заповедал да не го напуштаат Ерусалим, туку да го чекаат слегувањето на Светиот Дух.
Потоа ги одвел во Витанија, ги благословил и пред нивните очи се вознел на небото.
Библиските текстови опишуваат дека учениците гледале кон небото додека облак го сокрил Христос од нивните погледи, а тогаш им се појавиле ангели кои им кажале дека Исус повторно ќе дојде на ист начин како што се вознел.
Токму поради верувањето дека со Христовото вознесение се заокружува делото на спасението на човештвото, празникот во народот е познат како Спасовден.
Во македонската традиција, Спасовден се смета и за ден исполнет со духовна симболика, а во многу места се организираат литургии, собири и чествувања во чест на празникот.
